नव्या चित्रपटाच्या निमित्ताने...

" मी शिवाजी राजे भोसले बोलतोय" च्या यशानंतर आता पुन्हा एकदा "आनंदी आनंद " च्या निमित्ताने मोठ्या पडद्यावर येत्ये. वर्षभरापूर्वी चित्रीकरण झालेला आणि माझी प्रमुख भूमिका असलेला हा चित्रपट ७ मे ला प्रदर्शित होत आहे. शिवाजी आणि शुभंकरोतीने जशी नवीन ओळख दिली तशीच हा चित्रपटही देईल. साधी, सोप्पी कथा. मजा करणारी, संगीतात रमणारी, गावं आवडणारी, निसर्गात रमणारी अश्या आनंदीची हि गोष्ट.

पण नव्या सिनेमाच्या आनंद आणि उत्साहा बरोबरच थोडा दडपण पण आहे ते प्रमुख भूमिकेच, आपली सगळ्यांची मेहनत ३ तासात चांगली कि वाईट या परिमाणात मोजली जाते याचं. आपल्या या ४० दिवसांच्या मेहेनतीच योग्य फळ मिळेल याची शेवट पर्यंत खात्री नसते. पण तरीही उत्साह मात्र तेवढाच असतो.

शुभंकरोती मधील "किमया" शिवाजी मधली "शशिकला" यांच्या पेक्षा "आनंदी" खूप वेगळी आहे. खोडकर, मस्ती करणारी, गाणारी आनंदी करताना मला खूप मज्जा आलीच पण विक्रम गोखले, सुहास जोशी, वंदना गुप्ते, मोहन जोशी आणि पुरुषोत्तम बेर्डे या सारख्या कसलेल्या, मुरलेल्या कलाकारान बरोबर काम करण्याची संधी मिळाली आणि खूप खूप शिकताही आलं. लहान म्हणून सगळ्यांकडून खूप लाड पण करून घेतले.

फिल्म्स या नेहमीच खास असतात. पण शिवाजी आणि आनंदी आनंद या दोन्ही फिल्म्स माझ्या साठी नेहमीच खूप खास राहतील. या फिल्म्स नि मला नवी ओळख दिली आणि एक अभिनेत्री म्हणून मी पदार्पण केलं.

तुम्ही हा चित्रपट नक्की पहा आणि मला तुमचे अभिप्राय नाक्की कळवा.